Itxuraldeketa zer den, zertan den, zer esan nahi duen, nola gorpuzten den jakin nahi baduzue ez galdetu Kafkaren La metamorfosis kontakizun beldurgarriaren protagonista den gizon-zomorroari. Itaundu, ordea, banpiroak. Gregorio gaisoa patuak aginduta bihurtu zen kakalardo, beraz, ezer gutxi daki itxuraldaketaren edertasunaz. Nozitu zuen antzaldaketa baina ez zuen, ez horixe, aukeratu. Banpiroek bai. Banpiroek eraldaketaren erregeak dira. Aingeruak zirela diote libururik zaharrenek. Deabruak bilakatu ziren aingeruak.. Hor hasi zen amaierarik ezagutzen ez duen aldaketa, bukaerarik onartzen ez duen istorioa. Banpiroek ez diote beldurra denborari. Gizakiak bai. Mudantzak izutzen du gizakumea. Banpiroarentzat, berriz, erronkarik gozoena da. Mozorro guztiekin egin dute jolasa gaueko izaki miresgarriok. Planeta urrunetako biztanleak bailiren bezala ikusi ditugu hainbeste pelikulatan.

		Mende orotan ibili dira gauan barrena. Lur bat ere ez zaie arrotz. Kathryn Bigelowek Mendebalde basa aldera eraman zituen eta han ere aurkitu zuten odolaren arrasto gozoa... Itxuraldaketa... banpiroen ezaugarririk garbiena, ahalmen gaindiezina... Gauaren beste izakiek ez dute horren ondo denboraren hatzaparretatik alde egiten jakin.
	Garariek eta gizaseme-alaben apetak urratu dituzte apika apika beste monstruen erresuma ezberdinak. Gizon otsorik kasik ez da mundu honen ispilu gardena den zineman. Azkena, Jack Nicholson, hots, Michelle Pfeifferekin maitemindu zen arras. Bihak desagertu ziren gau batez. Agian Galiziako oihan sorgindu batean izango dira goxo goxo. Deabruak eta Santa Compaņak dakite... Frankenstein eta bere sorkaria ez ziren garaiz eta eroso garai berrietara egokitu. Kenneth Branaghek ere fabore eskasa egin zien biei bere filman. Momia... zer esango dugu momia maitiaz? Betirako dago lo ederrean Egipton Londoneko British Museumen bezala.... Dinosaurioak bai, dinosaurioek hor diraute baina ez dira deusik aldatu. Spielbergek munduaren haurtzaroan ziren bezalaxe berpiztu zituen... Ez, banpiroak dira gainbizi bakarrak. Berariek ederki asko jakin dute garai berrietara, modu modernoetara egokitzen. Gizakiok zomorroak bagina bezala aztertu gaituzte. Badute gure azken beldurren berri zehatza. Badira gure gaurko nahirik ezkutuenen jakitun. Badira gure egungo askatasunen kasik jeloskor eta gure biharko pasioen zelatari. Gure pausuen abiaduran pausatu dira mendeetan zehar. Gure biktimak izan dira zerua inpernua baino poteretsuagoa zela uste genuen denbora inozo horietan.
	Gurekin batera ikasi dute gurutzeak eta baratzuriek hor nonbait, hor noizbait galdu zutela indarra.... Banpiroek badakite, guk dakigun bezala, sua baino ez dela existitzen... Banpiroak, itxuraldaketaren sorgin eta azti nagusiak. Non islatuko zen hobekien mozorrotzeko duten abilidadea zineman baino? Ez al da ba zinema antzaldaketa guztien maisua? Ez al da kamera banpiro ororen metafora? Pantailan ditugu ba, liburuetan ere, ezin ahaztu, banpiro berri, garaiezin, ironiko eta eder horiek. Mundu ezagun eta ezezagun guztietako bost kantoietatik datozkigu libre eta balent. Eguzkitan egiten dute dantza (eguzkitarako betaurrekoen asmakizuna primeran etorri zitzaien) eta gauez, beren miresleek sorturiko kluba diseinuzkoetan edaten dute odol nahasia. Razor blade´ smile eta Revenant filmetan ikusi dugun lez, handiagoak, sakonagoak dira haien leinukoekin dituzten arazo, tira-bira, gatazka eta liskarrak gizakiokin dituztenak baino.Guk haien elikadura izaten jarraitzen dugu inoiz berarien amodioa lortzeko espero desesperatuan gaudela. Berariek, ordea, banpiro nagusien kontrako lehian dabiltza milurteko berriak, beharbada, errege-erregin banpiro ezberdinak exijitzen baititu... Banpiroak, gauaren izaki eder horiek, rock izarrak dira egun, larruzko jaka dotoreak jazten dituzte, Ray-Ban betaurrekoen modelo cool, very cool dira eta Drakula zaharra Van Helsing atzerakoia bezainbeste mesprezatzen dute orguilos.
		Banpiroak... bai urrun dira gurutzeak eta exolak! Banpiroak... gainbizi garbiak. Banpiroak, zinemaren beraren parekoak biek baitaukate bizirik, eder, hilezinik irauteko gaitasuna, itxuraldaketa guztien sekretua.

7/9